Даниел Николовски ќе го трансформира Ритко во вистински џентлмен преку низа животни предизвици - Почнува шоуто „Upgrade You“

Ново македонско шоу кое ќе ги мотивира младите, со Даниел Николовски и Ридван Мемедов...

„Upgrade You“ е едукативно-забавен јутјуб серијал во кој нашиот реномиран шминкер и фризер Даниел Николовски, како ментор, го води јутрјуберот Ридван Мемедов - Ритко, низ различни предизвици со цел да излезе од својата комфор зона и да „работи“ на себе.

Во секоја епизода Даниел му дава на Ритко нова мисија - посета на психолог, фитнес, бонтон, учење англиски јазик, читање книги, комуникација со луѓе, работа на својата лична култура, како и културно образование.

Сите овие предизвици ќе бидат прикажани низ хумор, интересни ситуации, но ќе ги покажат и реалните реакции на Ритко и луѓето со кои ќе комуницира низ следните неколку месеци, а сето тоа поддржано од една силна едукативна порака.

На крајот од секоја епизода јутјуберот ќе добива поени преку таканаречениот Upgrade Meter, а тие ќе се собираат низ целата сезона, секако, доколку тој успешно ги комплетира сите поставени задачи и предизвици.

Финалниот резултат ќе покаже дали успешно го поминал процесот на личен напредок, развој и едукација, па дали успеал да стане “Gentleman Found” или сепак ќе остане “Gentleman Not Found”.

Идејата на серијалот е преку забава да се мотивираат младите да работат на себе, да стекнуваат нови навики и да сфатат дека вистинскиот „upgrade“ започнува од личниот развој.

„Ова не е проект во кој сакаме некого да промениме затоа што не е доволно добар. Напротив, сакаме да покажеме дека секој човек има простор да расте и да стане подобра верзија од себе. Со Ритко ќе работиме на самодисциплина, комуникација, емоционална интелигенција, култура на однесување, грижа за себе и излегување од комфор зоната. Она што најмногу ме радува е што тој прифати искрено да влезе во овој процес. Не очекувам совршенство, туку вистински напредок. Ќе има моменти кога ќе му биде лесно, но и моменти кога ќе биде пред голем предизвик. Токму тие моменти ќе бидат најинтересни и најискрени. Верувам дека преку овој серијал ќе испратиме порака дека работата на себе не треба да биде срам, туку гордост. Ако успееме барем еден млад човек да инспирираме да прочита книга, да побара помош кога му е потребна, да научи нешто ново или да стане подобра личност, тогаш сме ја постигнале нашата цел“-вели Даниел Николовски.

Ритко, пак, вели дека е возбуден, и дека со нетрпение ги очекува сите предизвици, зашто постојат многу работи кои никогаш не ги направил во животот и убеден е дека до крајот на серијалот ќе биде многу подобра верзија од себе, но и вистински џентлмен.

„Идејата ми беше интересна уште од првиот момент затоа што знаев дека ќе морам да правам работи што никогаш не сум ги правел. Сакам да си докажам себеси дека можам да излезам од навиките во кои сум заглавен и да научам нешто ново. Сакам да станам подисциплиниран, подобро да се контролирам во одредени ситуации, да научам повеќе за бонтон, комуникација и работи што искрено досега не ми биле приоритет. Возбуден сум што сето ова ќе го споделиме со публиката без глумење, со сите успеси и неуспеси што ме чекаат попатно.Мислам дека најтешки ќе ми бидат предизвиците што бараат трпение, дисциплина и излегување од мојата комфор зона, но токму затоа и сакам да ги поминам. Се надевам дека на крајот ќе можам да кажам дека сум станал подобра верзија од себе и дека ќе ги мотивирам и другите да направат свој личен upgrade“-вели Ритко.

#Естрада