Најдобриот босански фудбалер, Џеко, во копачки од Сатја Грабулоски на Светско првенство

Един Џеко со настап на светското првенство...

Најдобриот босански фудбалер и капитен на репрезентацијата на Босна и Херцеговина, Един Џеко, на Светското првенство во фудбал ќе настапи во уникатни OneOfAKindS копачки, изработени од македонскиот уметник Сатја Грабулоски и неговото студио Swithadot Studios.

Дизајнот е инспириран од прекарот „Босанскиот змеј“ и вклучува рачно изработени елементи во сина боја, со босанското знаме и детали изведени со 18-каратно течно злато - симбол на големината, лидерството и наследството што Џеко го остава зад себе.

„Един е еден од најголемите спортисти што излегле од Балканот - капитен, лидер и, пред сè, одличен човек. Особено ми е драго што успеавме да го реализираме овој проект, бидејќи тој беше на самиот врв на нашата листа на желби. Сите имиња со кои сме соработувале имаат статус на GOATs и се најдобрите во своите генерации и лидери на своите репрезентации. Со овие соработки, на некој начин и Македонија ќе биде присутна на Светското првенство“-вели Грабулоски.

Копачките се дел од серијата ексклузивни спортски проекти на Swithadot Studios, студио кое досега има изработено уникатни парчиња за над 400 светски спортски и музички ѕвезди.

Уникатните патики изработени за Џеко се уште едно македонско дело кое ќе биде дел од најголемиот фудбалски спектакл на планетата.

#Спорт