Легендарниот Влатко Стефановски ги претстави новите албумски изданија пред македонската публика (фото+видео)

Влатко Стефановски неговите два албуми ги претстави во хотелот „Холидеј Ин“ во Скопје...

Македонската музичка јавност деновиве е во знакот на Влатко Стефановски, кој заедно со музичката и добропозната хрватска продукција Croatia Records ги промовираше своите две најнови албуми „Guitar Sings“ и „Muscle Memory“. Македонската промоција, што се одржа во скопскиот хотел „Холидеј Ин“ привлече големо внимание кај македонската и балканската медиумска јавност, На промоцијата  присуствуваа министерот за Култура  и туризам на Република Македонија Зоран Љутков, уредничката на Croatia records Клаудија Чулар, директорката на Croatia Records, Маја Видамар-Кариќ, Иван Бечковиќ, претставнкот на Croatia Records од Македонија ,соработници, пријатели како и љубители на музиката на Стефановски.

Скопската промоција следуваше по неодамнешното претставување на албумите во Сплит (Република Хрватска), каде Стефановски беше одликуван со престижната награда „Porin Special Merit Award“ за особен придонес во хрватската музика. Претставниците на „Croatia Records“ – Клаудија Чулар, Маја Видимар Клариќ и Иван Бечковиќ, истакнаа дека Стефановски со децении создава автентичен музички израз во кој се преплетуваат етно, рок, џез-фјужн и блуз музички жанрови, инспирирани од македонската музичка традиција.

Новиот студиски албум „Muscle Memory“, кој на 14 Мај 2026 година (четврток)  ќе биде објавен и на винил, содржи девет композиции  од кои  пет вокални и четири инструментални. На овој албум гостуваат врвни музичари како Звјездан Ружиќ, Дамир Имери, Горан Папаз, како и долгогодишните соработници Стефановски, а тоа се неговиот син Јан Стефановски и музичарот кој е син на добропознатите и наделеку прочуени музички имиња Ленче и Горан Кукиќ- Иван Кукиќ. Паралелно со албумот  „Muscle Memory“ беше претставен и инструменталниот проект „Guitar Sings“, на кој Стефановски на оригинален начин интерпретира дел од најпознатите композиции во соработка со Лондонскиот симфониски оркестар.

Влатко Стефановски, Клаудија Чулар, Маја Видимар Кариќ и Иван Бечковиќ

Покрај новите изданија, „Croatia Records“ ги објави и винилните реизданија на култните албуми на музичката група „Леб и сол“  кои се под наслов „Као какао“ и „Путујемо“, со што дополнително се одбележува богатото музичко наследство на бендот.

Во своето обраќање, Стефановски се присети на првата соработка со тогашниот „Југотон“ во 1983 година за албумот „Калабалак“, нагласувајќи дека низ децениите дискографската куќа секогаш имала разбирање за неговите музички идеи и експерименти.

„Јас сум гитарист што пишува песни, но и поет што свири гитара. Тие два принципа кај мене постојано се надополнуваат“ – изјави музичарот и гитарист Влатко Стефановски, и додава дека албумот  „Muscle Memory“ е негово 39 авторско издание.

Промоцијата заврши во одлична атмосфера кога легендарниот музичар на акустична гитара пред присутните ја изведе „Чукни во дрво“, поздравен со долг аплауз од истите. По официјалниот дел, Стефановски се дружеше со гостите и медиумите, потпишуваше ЦД-изданија и се фотографираше со присутните, со што уште еднаш ја потврди својата блискост со неговата верна музичка публика.

Христијан Ангелески

 

#Магазин