Песната ќе биде објавена на 13 април 2026 година...
На само 23 години, Никола Милосковски веќе почнува да го гради својот музички идентитет – тивко, но сигурно. Млад, харизматичен и со енергија која тешко се игнорира, тој доаѓа од Куманово и полека се наметнува како едно од најсвежите имиња на домашната музичка сцена. Интересно е што неговата приказна со музиката не започнува како внимателно испланирана кариера, туку како случајност што постепено се претворила во вистинска страст.
Иако љубовта кон музиката ја носел во себе уште од мал, идејата навистина да се посвети на пеењето дошла спонтано. Пресудниот момент биле луѓето – нивните искрени реакции и поддршката што ја добивал секогаш кога ќе запеел. Токму тие моменти, кога тој ќе ја почувствува емоцијата на своите блиски и публиката, го убедиле дека музиката е патот по кој треба да продолжи.
Никола живее динамично и спортски. Како што вели, спортот му е најдобар „издувен вентил“ од секојдневните обврски. А кога не е на сцената – често е веднаш до неа, опкружен со пријатели и атмосферата која ја носи младоста. Во меѓувреме, постојано работи на нови идеи и планови.
„Константно планирам и реализирам нови проекти и верувам дека сè ќе дојде на свое место“, вели тој, откривајќи дека неговиот фокус во иднина ќе биде сè повеќе насочен кон авторски песни.
Токму затоа посебно внимание привлекува неговиот прв официјален сингл – „Стари мој“. Песната е создадена во соработка со Емел Франца, додека видео записот го потпишува Алек Тасевски. Проектот веќе е целосно реализиран, а останува само да се дочека официјалниот датум на објавување – 13 април, кога публиката конечно ќе може да ја слушне и види приказната што Никола ја подготвува. Интересно е што соработката со Франца се случила благодарение на каверите што Никола претходно ги објавувал. Неговите преработки очигледно стигнале до вистинските луѓе во вистинско време. Емел му ја испратил песната, а Никола вели дека уште на првото слушање почувствувал дека токму таа е вистинската.
„На второ, трето, четврто слушање само си потврдив дека тоа е тоа“, раскажува тој.
Во моментов најчесто настапува во својот роден град Куманово, но полека неговите настапи се шират и во други градови низ Македонија, па дури и во Србија. Фестивалите засега не се дел од неговите планови – иако самиот признава дека мислењето може лесно да се промени. Но едно е сигурно: со првиот сингл „Стари мој“ и придружниот видео запис, Никола Милосковски прави сериозен чекор кон поголемата сцена. А ако се суди по ентузијазмот со кој зборува за музиката, ова можеби е само почеток на една многу интересна приказна.
Извор на информации: Музика 24
#Eстрада
Коментари
Постави коментар