Изложбата „поВРЗИНО“ од уметникот Стефан Анчевски ќе биде отворена в петок во НУЦК„Марко Цепенков“-Прилеп

 Анчевски има реализирано 11 самостојни изложби...

На 25 април 2025 година (петок) од 19.00 часот во Ликовната галерија од НУЦК „Марко Цепенков“-Прилеп ќе биде отворена изложбата „поВРЗИНО“ од уметникот Стефан Анчевски.

Стефан Анчевски поставува и создава сопствен концепт на дела, создавајќи јасна и специфична уметничка визија. Познавајќи различни медиуми и знаковни симболи, уметникот ги материјализира своите идеи низ низа технолошки процеси, овозможувајќи му да експериментира со различни визуелни и уметнички средства. Работи на принципот точка – права, полно – празно, геометрија и нејзино слободно толкување, движење, динамично групирање на нештата.

Стефан Анчевски со својата поетика и своите слики открива дека му е близок графолошкиот пристап кој се потпира на ликовните искуства на сликарството од ХХ век и ехото на колористичките исходи на Климт и неговите следбеници. Неговиот визуелен јазик како облик на комуникација е универзален и единствен.

Експериментирајќи со најразлични техники и материјали, авторот го создава циклусот „ВРЗИНО“ кој беше изложен во 2024 година во НУЦК „Трајко Прокопиев“ – Куманово. Втората изложба со наслов „преВРЗИНО“ реализиран во Ликовниот салон на ДЛУБ во Битола ги покажува нештата кои довеле до создавање на овој проект, односно се она што е работено претходно. Додека пак ова претставување „поВРЗИНО“ ги поврзува сите три излагања.Во третиот, развоен ликовен циклус на авторот Стефан Анчевски се поврзуваат сите заедно.

Стефан Анчевски  е роден во Куманово во 1993 година. Анчевски е визуелен и мултимедијален уметник. Дипломирал на Факултетот за ликовни уметности во Скопје при универзитетот „Св. Кирил и Методиј“. Има реализирано свои 11 самостојни изложби, учествува на преку 150 групни изложби и прикажувања во земјава и странство. Член на ДЛУБ  од 2022 година, од 2023 година е член на ДЛУМ, а од 2024 година член е и на ДЛУП Во 2014 година и 2023 година добитник е на прва награда „TrashForArt“ и прва награда „Let’s bring justice closer to citizens“ во 2023 година – COE – Национална галерија Мала Станица – Скопје.

Инаку, изложбата што ќе биде отворена в петок во НУЦК„Марко Цепенков“-Прилеп е поддржана од Министерството за култура и туризам, а истата ќе може да се погледне до 9 мај.

#Култура