Премиера на претставата „Ученикот’’ во Народниот Театар „Војдан Чернодрински“-Прилеп

Премиерата е утре (среда), а првата реприза е во четврток од 20 часот...

Во Народниот Театар „Војдан Чернодрински“-Прилеп утре во 20 часот премиерно ќе биде изведена претставата „Ученикот’’ која е под режисерска капа на Кирил Петрески.

Според драмскиот текст „Маченик“ на драмскиот писател Мариус Фон Маербург е создадена претставата „Ученик’’. Драмскиот текст на Маербург прв пат на сцена е одигран во 2015 година, а една година подоцна, во 2016 година направена е филмска адаптација на драмскиот текст од Маербург, а филмот е преведен и снимен во Русија со наслов „Студент“.

Режисерот на претставата „Ученикот“  , Кирил Петрески на денешната прес-конференција вели дека претставата „Ученик“ е со кратки филмски сцени и јазик, и се прикажани совреемените предизвици на младата генерација.

„Претставата „Ученик“ со кратки филмски сцени и јазик ги прикажува современите предизвици на младата генерација. Во време на политички и социјални екстремности, една млада личност се спротивставува на сите општествени препреки. Својот борбен начин го одбира во фанатизмот“-вели Петрески.

Имено, Петрески на прес-конференцијата додава дека не само на прилепскиот туку и на сите театри во Македонија им е потребен подмладок од млади актери, а како што вели Петрески во прилепскиот театар  скоро една деценија немало вработување на актер.

Актерот и толкувач на главната улога во претставата „Ученикот“, Зоран Иваноски на прес-конференцијата не ја криеше возбудата како и фактот дека за краток период се создала квалитетна театарска претстава.

„Вакво нешто јас немам доживеано во мојата дваесет годишна актерска кариера. Толку позитивно, сложено, едноставно, чисто и’ истовремено. Овие пет мина млади актери ми ја вратија желбата за творење и желбата да доаѓам на работа, и да творам онака како што јас знам“-вели Иваноски.

Во претставата „Ученикот“ улогите ги толкуваат Зоран Иваноски, Марија Спиркоска-Илијески и Александар Тодески, но и студентите по глума при Факултетот за Драмски Уметности во Скопје и тоа Лора Штарго, Иво Јездиќ, Марија Талеска, Наум Ѓорѓиески и Димитар Паскоски.

Сценографијата и дизајнот на плакат за претставата се на Владо Ѓорески, Александар Џинго е одговорен за костимографијата, а додека пак музиката е на Серафим Черенит.

Инаку, премиерата е закажана за утре, среда со почеток од 20 часот, а првата реприза е закажана за в’четврток на 26.12.2024 година од 20 часот.

Претставата „Ученикот“ е последна театарска премиера за оваа година која што е во продукција на Народниот Театар „Војдан Чернодрински“-Прилеп.

#Култура