Во Прилеп отворена е ретроспективната изложба на дела од уметникот Илија Миноски

Изложбата е отворена во ликовната галерија од НУЦК„Марко Цепенков“-Прилеп...

Во ликовната галерија од НУЦК„Марко Цепенков“-Прилеп вечерва беше отворена ретроспективната изложба на дела од уметникот Илија Миноски. Присутните, а и сите љубители на уметноста имаа можност да видат 40 дела од уметникот Миноски.

Мистер Каролина Мицевска, за изложбата на Миноски вели дека Миноски е еден од најплодните акварелисти не само во Прилеп, туку и во цела Македонија и на Балканот и дека со многу леснотија , сигурност, самоувереност и мајсторски го создаваше акварелот.

„Илија Миноски, еден од најплодните акварелисти во Прилеп, Македoнија и на Балканот.
Неговите дела, без оглед во кој период беа создавани, зрачеа со позитивност, уникатност. Имаше редок талент. И кога би творел во некоја друга средина би бил многу познат автор.
Миноски уште како мал се интересирал за уметноста, благодарение на тоа што потекнувал од уметничка фамилија. Илија Миноски по завршувањето на основното образование одлучува да продолжи да се надоградува во Училиштето за примената уметност во Скопје, за да во 1978 година дипломира на Педагошката академија во Скопје на одделот за сликарство во класата на проф. Б. Лазески, Д. Кондоски, Д. Тодороски, и Д. Пандилов. Најпрво младиот уметник работел како дизајнер, за да продолжи како наставник по ликовно образование во ОУ „Климент Охридски“. Од 1962 година па се до крајот на својот живот, до 2020 г., беше член на ДЛУМ. Илија беше исклучителен уметник, акварелист, кој целиот свој живот му го посвети на акварелот, истражувајќи го во секоја негова форма, како што често знаеше да ми посочи при нашите долги разговори. До последно, беше полн со елан да создава, да твори и да ја овековечува прилепската градска архитектура, прилепскиот пејзаж. За него особено беа привлечни Марковите кули, кои му беа неисцрпна инспирација. Кога ги гледав и порано, но и сега, во домашното депо, кое е обемно, се прашував и се уште се прашувам со која енергија, леснотија ги создаваше акварелите, кои ме внесуваа во светот на убавото. Очигледна беше нашата поврзаност како новинар и уметник. Тој долго да ми раскажува за она што го создава, а јас да пишувам за неговото творештво. Беше уметник кој сакаше да истражува, да создава нови творби или како што велеше „ со цело срце се предадов на миговното, апстрактното во акварелот“. Со многу леснотија, со сигурност во потегот, самоуверено, непоколебливо, мајсторски го создаваше акварелот. Постојано трагаше по нови форми во акварелот. Неговите дела се неповторливи, различни едни од други, затоа што сакаше да биде различен од претходно создаденото. А, делата беа перфекционистички создавани и стилизирани, како што знае да создава еден голем уметник на мигот.“-вели Мицевска.

На отворањето на изложбата присутен беше и прилепскиот градоначалник, Борче Јовчески кој за изложбата рече дека со голема чест и задоволство ја посетил вечерашната ретроспективна изложба на Миноски, а дека изложбата е вистинско културно богатство за Прилеп и ги повика сите љубители на уметноста и културата да ја посетат оваа изложба.

„Со голема чест и задоволство вечерва ја посетив ретроспективната изложба на мајсторот на акварелот Илија Миноски, која е поставена во Ликовната галерија при Центарот за култура „Марко Цепенков“.Оваа изложба е вистинско културно богатство за нашиот град, која ги претставува најзначајните дела на овој врвен уметник, познат по својата уникатна техника и извонредна уметничка визија. Делата на Миноски сведочат за талентот и посветеноста на македонските уметници и ја потврдуваат важноста на културното наследство што го негуваме.Ги повикувам сите љубители на уметноста и културата да ја посетат оваа изложба“-вели Јовчески.

Изложбата е во овогодишната работа од НУЦК„Марко Цепенков“-Прилеп и истата ќе може да се посети до 10 јануари.

#Култура