Изложбата на дела „Сеќавање“ ќе биде отворена утре во НУЦК„Марко Цепенков“-Прилеп

Утре во НУЦК„Марко Цепенков“-Прилеп ќе биде отворена изложбата „Сеќавање“...

Изложбата на дела под наслов „Сеќавање“ од уметникот Васил Костов ќе биде отворена утре во НУЦК„Марко Цепенков“-Прилеп. Отворањето е закажано за 18:00 часот во ликовната галерија од НУЦК„Марко Цепенков“-Прилеп.

Историчарот на уметност Елена Чагороска за изложбата „Сеќавање’’ од уметникот Васил Костов вели дека со ликовната поставка „Сеќавање“ се заокружува и се остварува замислата на Костов  за комплетна презентација на уметничко достигнување како и најголем успех во ликовната дејност кој остава печат на уметник на прилепската, макдедонската но и на пошироката ликовна сцена.

„Со ликовната поставка насловена „Сеќавање“ се заокружува и се остварува замислата на Васил Костов – комлетна презентација на уметничкото достигување, најголем успех во ликовната дејност кој остава печат на уметник на прилепската, македонската ликовна сцена и пошироко. Уметничкото достигнување во творечкиот период од шест децении како активен неуморен на речиси сите ликовни полиња со разновидна техника и материјали: масло на платно (каде што е доминантен), акварел, гваш, графика, обиди на работење во дрво и други материјали. Подолги години работи како сценограф во Народниот театар „Војдан Чернодрински“ и повремени студиски престои во Париз, Венеција, Москва, Варшава. Од значење е што сите создадени и објавени ликовни дела се систематизирани и проучени од ликовните критичари. Последните години од животот ги посветува на непополнети моменти, сеќавања од детсвото, како бегалец од Егејска Макеоднија, со многу страдања и слики од доживеани настани. Полн со емотивни чувства, уметникот започнува секоја слика, сеќавања и доживувања да ги сублимира, со идеја да започне серијал на слики насловени како „Сеќавање“ - бегалски сеќавања од 1945 – 1952 година. Така последните години од животот ги посветува во создавање на циклус ликовни дела со тематика бегалците од Егејска Македонија. Костов претпочита посредно да ја вознемири нашата индолентност, нашата духовна пасивност, да го поттикне нашиот интелект на размислување, акција, определување. Творбите на Костов во богатството на своите потенции, содржат извонредно доследен, естетски, сублимиран вид создавање, на едно колористички и обликувано, диференцирано и специфицирано ликовно творештво. Костов успеваше да постигне ефекти на рамнотежа помеѓу формата, идејата, композицијата, тоналитетот и нарацијата. Делата предизвикуваат естетско доживување, ја покренуваат фантазијата кај гледачите, а уметникот умее да си поигра со колоритот на боите, хармоничност и потези кои го напојуваат окото на гледачот.“-вели Чагароска.

Уметникот Васил Костов реализирал повеќе самостојни изложби во земјава но и во странство, бил дел од групни изложби, а исто така е добитник и на повеќе награди како што се Првата награди за млади уметници, Скопје во 1958 година, наградата за сценографија за претставата „Балада за орканата“ во 1968 година, награда за сценографија за претставата „Од глава си патиме“ во 1970 година, наградата за сликарство, Прилеп во 1980 година, откупна награда „Свети Климент Охридски“ , Скопје во 1986 година, наградата за сликарство, Прилеп во 1987 година како и 9-то ноемвриската награда во Прилеп во 1993 година.

Изложбата „Сеќавање“ што ќе биде отворена утре во ликовната галерија од НУЦК„Марко Цепенков“-Прилеп ќе може да се погледне до 19.12.2024 година (четврток) до 10:00 часот наутро.

#Култура